अक्षरवेल मराठी विद्यालय
दूरदेशीचे आपले हक्काचे माहेर… आइंधोवन मराठी मित्रमंडळ!
नेदरलँड्ससारख्या दूरवरच्या देशात राहणाऱ्या आपल्या मराठी बांधवांना आपल्या मायबोलीशी आणि समृद्ध संस्कृतीशी घट्ट जोडून ठेवण्याच्या उदात्त हेतूने आइंधोवन मराठी मित्रमंडळा'ची स्थापना झाली आहे. आपली मराठी भाषा, आपले सण-उत्सव आणि आपली सांस्कृतिक मूल्ये केवळ जपणेच नव्हे, तर ती आपल्या पुढच्या पिढीपर्यंत अत्यंत अभिमानाने पोहोचवणे, हा आमचा प्रामाणिक ध्यास आहे. आपल्या मातीची आणि परंपरेची हीच ओढ आपल्या चिमुकल्यांनाही लागावी, यासाठी आम्ही अत्यंत आनंदाने घेऊन येत आहोत आमचा एक महत्त्वाकांक्षी आणि जिव्हाळ्याचा उपक्रम -"अक्षरवेल मराठी विद्यालय"!
आपल्या मुलांना घडवणारी आपली स्वतःची मराठी शाळा!
आज आपली मुले परदेशात वाढत आहेत, इथली डच भाषा आणि जीवनशैली अत्यंत उत्तमरीत्या आत्मसात करत आहेत, ही नक्कीच कौतुकाची बाब आहे. पण या प्रवासात आपली मुले आपल्या मराठी मुळांपासून आणि भाषेपासून दुरावू नयेत, याची काळजी घेणे आपले कर्तव्य आहे. मातृभाषा हा केवळ संवादाचा पूल नसून, ती आपल्या संस्कृतीची, इतिहासाची आणि अस्मितेची ओळख असते. मुले घरात थोडीफार बोलीभाषा बोलतातच, पण त्यापलीकडे जाऊन त्यांना मराठी वाचन, लेखन, आणि साहित्याची गोडी लागावी, या उद्देशाने 'अक्षरवेल'ची निर्मिती झाली आहे. गाणी, गोष्टी, खेळ, आणि विविध कलांच्या माध्यमातून मुलांना आपल्या भाषेचा व गौरवशाली इतिहासाचा एक आनंददायी आणि सखोल अनुभव येथे घेता येईल. चला, आपल्या पाल्यांच्या मनात मराठीचा स्वाभिमान रुजवूया!
कविता पेंढारकर
कविता पेंढारकर यांनी Early Childhood Care and Education (ECCD) मध्ये डिप्लोमा पूर्ण केला आहे. भारतातील पोदार जंबो किड्स आणि सिटी प्राइड स्कूलमध्ये त्यांनी एकूण ४ वर्षे शिक्षिका म्हणून काम केले आहे. लहान मुलांना शिकवणे आणि त्यांच्या विकासात योगदान देणे ही त्यांची आवड आहे. याच आवडीने त्या आइंदहोव्हनमधील मराठी शाळेच्या उपक्रमात सहभागी झाल्या असून, मुलांना मराठी भाषा शिकवणार आहेत. स्वयंसेवकांच्या या उपक्रमाद्वारे मुलांना आपल्या मातृभाषेशी जोडून ठेवण्याचा प्रयत्न करत आहोत.
मनिषा धर्माधिकारी
मनिषा धर्माधिकारी बी.एड. पदवीधर असून १० वर्षांचा अध्यापनाचा अनुभव आहे. मॉन्टेसरी प्रशिक्षण पूर्ण केले आहे. मुलांना शिकवणे ही त्यांची आवड आह े .मराठी भाषा,मराठी साहित्य आणि संस्कृतीबद्दल त्याना विशेष प्रेम आहे आणि ह्या आवडीमुळेच आइंधोवन मराठी शाळेच्या उपक्रमात शिक्षिका म्हणून सहभागी झालेल्या आहेत .मुलांना मातृभाषेशी आणि समृद्ध मराठी संस्कृतीशी जोडण्याच्या स्वयंसेवकांच्या उपक्रमात
हा सुंदर प्रवास सुरू करण्यास उत्सुक आहे.